إصابة 18 مواطنا باشتباكات وتزاحم على "شنطة رمضان" بالدقهلية

تزاحم نحو 6 آلاف مواطن داخل وخارج استاد المنصورة صباح الاحد في انتظار تسلم شنطة رمضان التي توزعها المحافظة على المحتاجين، وسقط نحو 10 أشخاص مغشياً عليهم من شدة الحرارة، بينما أصيب 5 آخرون نتيجة التدافع والزحام، ونقلت سيارات الإسعاف 3 سيدات ورجلاً إلى مستشفى المنصورة الدولى لتلقى العلاج إثر إصابتهم بهبوط حاد في الدورة الدموية.
ونشبت اشتباكات بين الأمن والمواطنين أثناء محاولة التنظيم ومنع المواطنين من اختراق البوابات، وقال شهود عيان إن أحد أفراد قوات الأمن تعدى على المواطنين بالضرب لمنعهم من دخول الاستاد.
وقالت احدى المستحقات للشنط وتدعى علياء سليمان "أنا أرملة وعندى 4 أولاد وأحصل على معاش من الشؤون الاجتماعية حوالى 100 جنيه وواقفة من الساعة 6 الصبح علشان آخد الشنطة أفرح بيها العيال لأنى ماباقدرش أشترى حاجات رمضان ولولا أهل الخير كنا شحتنا".
وقال محمد الوكيل "الحكومة كانت الأول بتوزع الشنط دى على مكاتب الشئون الاجتماعية فى كل مركز ونروح ناخدها منها بكرامتنا لكن منذ 3 سنوات قامت المحافظة بتجميع التوزيع فى الاستاد علشان ناخد جزء من حقوقنا عندها"، بحسب صحيفة المصري اليوم.

وقالت سيدة اخرى "بنقف من الساعة 6 صباحاً حتى 5 عصراً فى عز الحر علشان ناخد شنطة رمضان وكل اللى فيها "كيس سكر وكيس أرز وكيس مكرونة وزجاجة زيت وكيلو بلح ونصف كيلو زبيب".
وفي محاولة لمنع الزحام أمر اللواء سمير سلام، محافظ الدقهلية، بفتح بوابات الاستاد لجميع المواطنين للدخول وانتظار موعد التوزيع الذى بدأ فى الثانية عشرة ظهراً.

حسبى الله ونعم الوكيل
فى الاجتماع بتاع الوزير على مصيلحى وزير التضامن فى شهر 7 كان بيعتمد الميزانيه بتاعه بنك ناصر
انا كنت حاضر الاجتماع الوزير بيسمع كلمه رؤساء القطاعات فجه رئيس قطاع التكافل بيتكلم راح الوزير مسح بيه الارض رئيس القطاع بيقوله مليون ونص لشنطه رمضان راح قاله تعمل كشف بأسماء الناس دى والشنط تروح لحد بيتهم بلاش تفضحوا الناس وتخلوهم يجوا يستلموا بنفسهم زى ما بنشوفف فى التليفزيون الشنط تروح لحد بيتهم وقال الشعب المصرى مش شعب شحات ده شعب انف ومحدش يزل الشعب المصرى
بس طبعا محدش بينفذ كلام الوزير وبمجرد انتهاء الاجتماع لو قولت للمدير على حاجه الوزير قال كذا بيقولى ياعم هو الوزير يعرف حاجه ده قاعد فى التكييف وميعرفش حاجه

والله ده اللى بيحصل انا قبل ما احضر الاجتماع كنت بقول الوزير ده فاشل بعد ما حضرت اتصدمت صدمه رهيبه الوزير مسح بالمديريين الارض قالهم انتوا مبتعملوش حاجه غير انكوا تمضوا وتبصموا وتختموا وقعد يشاورلهم بايده كأنهم بصمجيه
روحت البنك تانى يوم لقيتهم برضه بيتخانقوا على الامضاءات
الوزير قالهم بلاش نظام موظفيين الحكومه بتاعكوا كفايه روتين وتعطيل لمصالح الناس
ده انا اتجننت لما سمعته بيقولهم انا فلاح من الشرقيه وفاهم الحركات اللى بتعملوا علشان توزعوا الناس
والاخر الكلام ده ولا بيأثر ده لو بيكلم حجر كان اتأثر بالكلام

وان كان الحكومه مش عليها السلام ...بس طول عمري اقول الشعب نفسه مايستاهلش حكومه كويسه

إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ