عمـــ(2)ـــاد متعــب : الزمالك يفاوضه

بيشحتوا علينا
مش عاوزين منكم حاجة
انتم مين اصلا ولا ليكم لازمة اساسا


ايه شغل الاستعباط ده
ما لو عاوز الاهلي يستفيد كان جدد

بس ده بيعمل كده عشان يقول انا عملت الي علي
او عشان يحسس نفسه ان ضميره مرتاح
مين النادي الاهبل الي حيدفع فلوس للاهلي او لنادي
ملوش عقد مع لاعب
ولو دفع حيدفع كام يعني

ثانيه واحده يا جدعان عشان انا هيجرالى حاجه بقى

هو ليه اداره الاهلى بتتعامل مع متعب وكان ده حقه الطبيعى وعادى جدا وكتر خيره انه قاعد معانا لحد دلوقتى

بجد فيه حاجه غريبه انا مش فاهمها

الاداره مسانده متعب جدا وموافقه انه يمشى من غير ما يجدد

هل مثلا هما شايفين انه ديه اخر فرصه ليه فى الاحتراف وانه قبل كده احترافه باظ بسبب تمسكه بلعب ماتش الزمالك فقالوا يسيبوه تكريما ليه على تاريخه مع الاهلى زى ما سابوا جمعه يروح السيليه وادوله كل المقابل المادى ؟

والا هما شايفين انه مفيش امل انه يجدد وفى نفس الوقت مش عاوزين يقلبوا عليه ويخسروا جهوده لاخر الموسم لانه ملوش بديل حاليا ؟

بصراحه انا مش فاهم ...موقف الاداره من موضوع تجديد متعب غير واضح بالمره وغريب جدا

يطلعوا يقولوها بصراحه بقى عشان الناس تبقى فاهمه

يا اما يقولوا احنا هنسيبه عشان يحقق حلمه ولان ده اخر فرصه ليه فى الاحتراف يا اما يقولوا متعب رافض التجديد وهيخلع من غير ما نستفيد منه ماديا

انما الامور العايمه ديه والموقف الغريب ده مش مفهوم بصراحه

منين كل الجمهور نازل شتيمه فيه عشان عاوز يمشى ببلاش ومنين الاداره متفهمه موقفه وموافقه عليه ؟

لا بجد يا اسامه حاجه غريبه جدا

كل كلام البدرى والقيعى والمنيسى وهادى اشاده بمتعب وبسلوكه الاحترافى وانه الاهلى بيته ومعندوش مشكله خالص فى موضوع التجديد لو مفيش احتراف

الظاهر فعلا انه فيه اتفاق او تفاهم على الموضوع ده

وممكن فعلا يكونوا متفقين على انه ميجددش عقده والاهلى ياخد مبلغ مالى ممكن يكون من قيمه عقد متعب نفسه مع النادى اللى هيوقعله

اصل الطبيعى بالنسبه للاداره انه كان بيبقى فيه صمت رهيب

لكن فى موضوع متعب مفيش صمت ....اللى انا شايفه ان الاداره بتهيأ الرأى العام الاهلاوى انه متعب هيمشى من غير ما يجدد وحاسس ان الاداره نفسها مش عاوزه تشوه صوره متعب قدام الجمهور عشان كده بقول انه ممكن يكون فيه اتفاق ما بين متعب وبين الاداره

الله اعلم

بس هم اكيد مش حيطلعوا يقولوا انهم فاشلين
انهم فشلوا في اقناع لاعب بالتجديد من ابناء النادي
وان اللاعب ضحك عليهم
وكل شوية يقولهم حجدد وفي الاخر داهم على قفاهم وحيمشي ببلاش

فلازم يطلعوا يقولوا ان العملية كلها برضاهم

ما هو ممكن يكون النادى حاسس انه مش هيجيب مبلغ كبير عشان كده قالوا نسيبه

او نادر شوقى هو اللى اقنعهم انه سعره مثلا نص مليون استرلينى ومحدش هيدفع فيه اكتر من كده وطلب منهم انهم يدوه فرصه على اساس انه ادى للاهلى كتير وان الاهلى لازم يساعده فى تحقيق حلمه والكلام اللى انت فاهمه ده

عشان كده بقول لازم يبقى فيه رد قاطع من الاداره ...يا اما يا اخوانا احنا هنسيب متعب تكريما ليه يا اما يا اخوانا الراجل ده ندل وهيخلع من غير فلوس

عشان الامور تبقى واضحه بس

لان واضح انه فى الموضوع ده راى الجمهور فى وادى وراى الاداره فى وادى تانى خالص

شلبى هيستضيف نادر شوقى النهارده عشان يتكلم فى موضوع متعب

هبقى انقلكم هو قال ايه

لا بجد يا اسامه حاجه غريبه جدا

كل كلام البدرى والقيعى والمنيسى
وهادى اشاده بمتعب وبسلوكه الاحترافى وانه الاهلى بيته ومعندوش مشكله خالص
فى موضوع التجديد لو مفيش احتراف

الظاهر فعلا انه فيه اتفاق او
تفاهم على الموضوع ده

شكلهم متوقعين انه هيفشل فى الاحتراف -زى ما كل الجماهير مقتنعه بكده - فعايزين يضمنوا انه يرجع الاهلى لما يفشل لان لو حصل مشاكل هو كده كده هيمشى غصب عنهم فممكن يرجع على الزمالك

اهو نادر شوقي قالها

حنحاول نشوف للأهلي قرشين

بس لو ده حيضر بمفاوضات ضم متعب

حيقولوا طز في الاهلي

نادر شوقى بيقول ان متعب فعلا عنده عرضين من قيصرى سبور ومن جنوه وهما
عاوزين يتعاقدوا معاه دلوقتى عشان الموسم الجديد بس هو مش عاوز متعب
يتعاقد مع حد فيهم دلوقتى عشان هو هيبقى عنده عروض تانيه فى الصيف من
انديه فى انجلترا من المركز ال12 وانت نازل وهو مش عاوز عماد يتسرع

وبيقول ان اداره الاهلى متفمه تماما لموقف متعب وبتتعامل مع الموضوع
باحترافيه واداره الاهلى ملهاش اى علاقه باى محاولات تسخين اعلاميه على
متعب

وبيقول انه متعب عنده 27 سنه وبقاله 14 سنه فى النادى الاهلى واعتقد انه من حقه انه يعمل اسم فى اوروبا ال3 سنين اللى جايه

وبيقول انه متعب عاوز الاهلى يستفيد ماديا وانه هو هيدخل فى مفاوضات مع
الانديه اللى عاوزه تتعاقد مع متعب عشان يبقى فيه مقابل للنادى الاهلى بس
لو هما رفضوا هو مش هيقدر يعمل حاجه ...هيشحت علينا من الاخر

قصر الكلام ....شكل متعب متفاهم مع الاداره على الموضوع ده واحنا اللى دمنا بيتحرق فى النهايه

حسام غالى مضى مع نادر شوقى اول امبارح

يعنى من الاخر انسوا ان الاهلى يجيب غالى الموسم الجاى

في داهية بقه

وبيقول انه متعب عنده 27 سنه

!!
ده محققش اى انجازات ده انا كنت متوقع ان متعب لما يبقى 26 سنه يدخل نادى ال100
ياخساره

وانا اللى كان دم اهلى محروق اخر حاجه وفى الاخر طلعت الاداره مش طرف وموافقه كمان وبتبارك الموضوع

ده انا طلعت اهبل اوى ...قال كان نفسى النادى يستفيد ماديا قال ...ده انا طلعت دقه قديمه اوى يا جدعان

هم دول ولاد الاهلي

اكتر ناس بتبيع الاهلي عشان مصلحتها

انا اكتر حاجه حارقه دمى انهم بيشحتوا عالاهلى

خلاص يا عم الكوتكوت ما دام هتمشى من غير ما تجدد يبقى متحسسش نفسك بالذنب
وتشحت علينا ولا تحسسنا اننا ماديين وكل اللى يهمنا انك ترميلنا قرشين قبل
ما تخلع

خلاص اتكل على الله وربنا يوفقك من غير الافلامانات ديه ما دام انت متفق
مع الاداره على كل حاجه واحنا اللى بناخد على قفانا فى الاخر عشان عاوزين
مصلحه النادى

وايه حكايه انك هتقعد تناقش العروض مع اداره النادى ومش هتمشى غير بموافقه النادى ديه مش فاهم ؟

يعنى انت مش مرتبط بعقد مع النادى وجالك عرض وانت عاوز تروح والاهلى قالك لا مش هتروح ؟ ...هتأفلم بقى

خلاص يا عمونا متبالغش فى الكلام ...ما دام فيه اتفاق بينك وبين الاداره
اتكل على الله من غير ما تشحت على النادى ولا تحسس نفسك بالذنب

كان المفروض البهوات بتوع الاداره يطلعوا يقولوا الكلام ده من الاول بدل ما هما سيبينا نقطع فى الورده ونقول هيجدد لا مش هيجدد

اعتقد ان مشكله التجديد جت من ان متعب حاليا عنده عروض رسميه والانديه
اللى قدمتله العروض ديه عارفه انه هيبقى فرى اخر الموسم وطبعا لو هو جدد
عقده بعد ما جتله العروض ديه معناها انه بيرفض العروض ديه ....اعتقد انه
وجود عروض رسميه فى الوقت ده هو اللى عمل المشكلهوالله اعلم

محدش من الاهلي طلع قال فيه عروض

والله انا كنت حاسس كده من ساعه ما سمعت كلام هادى والبدرى والمنيسى والقيعى ...قلت من امتى بنعمل كده مع لعيب مش عاوز يجدد عقده

ده احنا اللعيب اللى مكانش عاوز يجدد كنا بنهيج عليه الجمهور والاعلام لحد ما يسلم ويقول حقى برقبتى ولنا فى ما حدث مع بركات عبره

اعتقد ان الاداره حسبتها بالورقه والقلم ...هما قالوا متعب لعب فى الاهلى
5 سنبن مدفعناش فيه ولا مليم وكان بيلعب وبياخد 200 الف جنيه فى الموسم
واعرناه مره وخدنا فيه 600 الف دولار وهو ابن النادى وادى النادى كتير
وديه اخر فرصه ليه فى تحقيق حلمه اللى هو مصر عليه وهو مش هيجيب فى كل
الاحوال مبلغ كبير الا اذا اتباع لنادى عربى وهو مش عاوز يروح الخليج يبقى
نسيبه ونحتفظ بعلاقه كويسه معاه عشان لو فشل يرجع بيته وهى كده كده كلها
سنين تلاته وراجع راجع

osamahlawy wrote:محدش من الاهلي طلع قال فيه عروض

العروض عند متعب يا اسامه مش عند الاهلى

الانديه دلوقتى بتفاوضه هو مباشره عشان كده الاهلى مش هيبقى عنده اى عروض لمتعب ولا الاهلى هيعرف عنها حاجه


الانديه كلها هتفاوض اللاعب مباشره لانه عقده انتهى لكن هتفاوض الاهلى وتبعتله عروض بصفته ايه ؟

لا هو ضحك عليهم
وهم مش حيطلعوا يقولوا ان اللاعب ضحك علينا

تمام
بس برضه أكيد حد عارف في الاهلي الموضوع

ما كتير قوي متعب ووكيله
طلعوا قالوا فيه عروض
ومكنش فيه حاجة في الاخر
وراح السعودية في الاخر